Imaxe escoitar Escoitar

Unha muller morre afogada nun río da Pobra do Caramiñal

Unha muller duns 60 anos afogou hoxe na Pobra do Caramiñal. Os feitos aconteceron no río Pedras, na zona de Portocarro. O 112 Galicia tivo constancia da situación ás 13:45 horas deste mediodía. Os efectivos sanitarios trasladáronse á zona no helicóptero medicalizado con base en Ourense, mentres que Salvamento Marítimo mobilizou o helicóptero Pesca 1. Esta última aeronave rescatou o corpo sen vida da muller e trasladouno ao Hospital do Barbanza. O persoal do CAE 112 Galicia informou do afogamento aos Bombeiros de Ribeira. Tamén se alertou a Protección Civil e á Garda Civil, que enviaron varios efectivos ata o lugar dos feitos.

 

Rescatan un mozo na Pobra do Caramiñal despois de caer nunhas pozas

Un mozo foi rescatado esta mañá na Pobra do Caramiñal, logo de caer nunha zona de pozas do río Pedras. A operación viuse dificultada polas condicións do terreo. O varón foi rescatado polo helicóptero Pesca 1 e trasladado ao Hospital do Barbanza. Foi a súa propia nai a que chamou ao 112 Galicia ás 13:00 horas de hoxe alertando de que o seu fillo quedara inconsciente despois de caer dunha piscina a outra do río. Apuntou amais que o rapaz xa estaba fóra da auga. O persoal do CAE 112 Galicia informou de inmediato a Urxencias Médicas. Os efectivos sanitarios mobilizaron o helicóptero medicalizado con base en Santiago e unha ambulancia. O 112 Galicia tamén alertou a Salvamento Marítimo, que enviou o helicóptero Pesca 1 para proceder ao rescate do mozo ferido. A situación tamén se puxo en coñecemento do Servizo de Gardacostas de Galicia, dos Bombeiros de Ribeira, da Policía Local, de Protección Civil e da Garda Civil. Por outra banda, no concello de Miño, un home sufriu unha indisposición mentres estaba na Praia Grande da localidade. O 112 Galicia recibiu o aviso ás 12:30 horas de hoxe. O home comezou a sentirse mal estando no mar. Os socorristas axudáronlle a saír da auga. Xa na area, o varón sufriu unha indisposición. O persoal do 112 Galicia alertou a Urxencias Médicas. Os efectivos sanitarios desprazáronse ata o areal cunha ambulancia. O home foi trasladado a un centro sanitario. O acontecido tamén foi posto en coñecemento da Policía Local de Miño.

 

Dobre atropelo no Porriño

Unha muller e a súa neta, duns tres anos, foron atropeladas por un coche esta tarde no Porriño. Os feitos producíronse na avenida Principal do Polígono da Granxa. O propio condutor do vehículo implicado telefonou ao 112 Galicia ás 15:30 horas de hoxe. O persoal do CAE 112 Galicia informou a Urxencias Médicas, aos Bombeiros do Baixo Miño, á Policía Local, a Protección Civil e á Garda Civil de Tráfico. As dúas persoas atropeladas foron trasladadas a un centro sanitario de referencia. Por outra banda, en Cambados, un accidente entre tres vehículos deixa unha persoa ferida. A colisión múltiple rexistrouse na avenida de Galicia. O 112 Galicia recibiu a alerta ás 18:30 horas desta tarde. Os profesionais do Centro de Atención ás Emerxencias informaron aos Bombeiros do Salnés, á Policía Local e a Protección Civil. A persoa ferida foi trasladada a un centro sanitario.

facebook twitter instagram